ماذا أفعل لكي احافظ على الصلاة؟
{فَخَلَفَ مِن بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ ۖ فَسَوْفَ يَلْقَوْنَ غَيًّا}
الصلاة تقيلة عليه ومش عارف أحافظ عليها 
يا عم الشيخ دي قصة صعبة، والكلام ده خمس مرات، ولو عملتها مرة مش هعرف أعملها كل يوم .. أنا مش عارف أعمل إيه!
وأنت يا اللي سافرت دكتوراة في كندا ٦ سنين عايش في وسط التلج، ماكانتش تقيلة على قلبك ليه؟!
وأنت يا اللي بتصحى للشغل كل يوم الساعة ٦ ولا ٧، ماكانش تقيل على قلبك ليه؟!
وأنت يا اللي بتذاكر في كلية زي كلية الطب بقالك ٧ سنين ماكانتش تقيلة على قلبك ليه؟!
يا عم الشيخ ده مستقبلي، دي حياتي! 
وأنت عارف الصلاة دي خطيرة قد إيه؟! وأنت عارف أنت هتُسأل على إيه؟! 
الصلاة أهم من كل شيء في حياتك لإنها مصيرك وفيها نجاتك يعني السؤال أبو ٢٠ درجة اللي في ورقة الامتحان اللي لو ماحلتهوش هتسقط، وعارف يعني إيه ده الفصل اللي الدكتور قال إن اللي هيذاكره هينجح ..دي الصلاة!
عارف يعني إيه آخر وصية لرسول الله، وتبقى آخر حاجة في حياتك ازاي؟!
الصلاة دي شأنها خطير جدًا، يعني دي حاجة مهولة!
كل حاجة ربنا نَزِّل جبريل للنبي عشانها، إلا الصلاة ربنا طَلَّع النبي عشان ياخدها ..
رسول الله صلى الله عليه وسلم قال: "والذي نَفْسِي بيَدِهِ لقَدْ هَمَمْتُ أنْ آمُرَ بحَطَبٍ، فيُحْطَبَ، ثُمَّ آمُرَ بالصَّلاَةِ، فيُؤَذَّنَ لَهَا، ثُمَّ آمُرَ رَجُلًا فَيَؤُمَّ النَّاسَ، ثُمَّ أُخَالِفَ إلى رِجَالٍ، فَأُحَرِّقَ عليهم بُيُوتَهُمْ، والذي نَفْسِي بيَدِهِ لو يَعْلَمُ أحَدُهُمْ، أنَّه يَجِدُ عَرْقًا سَمِينًا، أوْ مِرْمَاتَيْنِ حَسَنَتَيْنِ، لَشَهِدَ العِشَاءَ".
الناس اللي مابتصليش، النبي حكم عليه بالقتل والإعدام ليه؟لأنه عامل زي خلية سرطانية، لو اتسابت هتنتشر جوه أجزاء الجسم!
النبي ماقالش يتقتل، حكم عليه بالحرق ليه؟ 
لأن اللي بيموت بيكون ليه جثة وسط مقابر المسلمين، لكن اللي يتحرق جثته بتكون رماد وبتطير ..كأن النبي بيقول ولا عايزينه معانا ولا حي ولا ميت!
النبي ماقالش هحرقه، قال هحرق عليه بيته، يعني هحرقه هو وبيته .. ليه؟! كأن النبي صلى الله عليه وسلم يريد إن تارك الصلاة ولا حتى ذكرى تتساب ليه في المجتمع، ولا حتى حد يقول إن دا كان بيت فُلان! أنت مستتقل الصلاة، إنما أنت مش عارف بسبب ترك الصلاة أنت بتعَرض نفسك لإيه! أخطر حاجة ساعة ما هيكون حلقك هيتمزق من العطش، تروح للنبي وتقوله بُق ماية يا رسول الله .. أنت أصلًا عشان تدخل على حوض النبي محتاج يكون معاك علامة الوضوء؛ لأن أماكن الوضوء بتنور يوم القيامة، واللي مابيصليش مابيتوضاش ..
في الساعة دي الأسهل إن أنت كنت تصلي ولا تستحمل الموقف ده؟!عايز تحافظ على الصلاة أعرف أهمية الصلاة وعقوبة تركها عشان تخاف ما تتركها وخوفك هو الل هيساعدك إنك تحافظ على الصلاة