الفرق بين صلاة الفجر و صلاة الصبح
لا يوجد فرق بين صلاة الفجر و صلاة الصبح
لأن الرسول ﷺ قال " من صلى الصبح في جماعة فكأنما قام الليل كله"
ليه بنوضح الفرق ؟
عشان ما فيش حد يفتكر إن معنى صلاة الصبح إني أصليها بعد شروق الشمس وفاكر إني أنا كده صح
لا ده كده تبقى مصيبة لإنك ضيعت عليك صلاة الفجر وصلتها في غير وقتها من غير عذر
وماحدش يقول كنت تعبان ما قدرتش مهو ممكن تموت ولا تلحق تصلي ولا تلحق ترتاح فالحق صل الفجر قبل نومك ولو في عز تعبك لعلها المنجية
خد بالك اللي تستثقل صلاة الفجر على قلبها حكمها صعب جدًا عند ربنا ، ده من علامات النفاق.
منظر محزن لما نبقى بنصلي في المسجد و مفيش غير كام واحد بس ... و بعدها بساعة لو رميت إبرة مش هتنزل من كثرة الشباب.
أول ما الدنيا نادت الساعة سبعة الصبح الكل صحي و لما ربنا نادى مين اللي صحي
الرسول ﷺ بيحذرك و بيقولك في صحيح البخاري إنه رأى العذاب في القبر فرأى ملك ماسك حجارة و بيقذفها على واحد لحد ما رأسه اتفرم
فالرسول ﷺ قال ما هذا قال له الملك الذي معه في الرؤية : و كان ينام عن الصلاة المكتوبة.
كانت رأسه بتتقل لما الفجر يأذن أو لما الظهر يأذن فيعذب في رأسه إلى يوم القيامة.
عايز تصحى يبقى لازم حاجة بينك و بين ربنا و هي الدعاء
ادعي ربنا و قوله يا رب صحيني لصلاة الفجر ... يا رب حبب إليَّ صلاة الفجر.
قل وكلتك يا رب تصحيني أصلي الفجر وثق بالله إنك تصحى
خلي مراتك تشجعك أو واحد من صحابك يتصل بيك.
الصدق مع نفسك لو أنت عايز فعلًا تصحى تصلي الفجر.
طب أذاكر امتى
ذاكر بعد الفجر، أعظم مذاكرة هي مذاكرة بعد الفجر
ربنا وفقنا و نجحنا و طلعنا من الأوائل بسبب مذاكرة بعد الفجر دي
تعليقات
إرسال تعليق