الجنة في صيام النافلة في الشتاء
يوميََا بيمر علينا في أى مشوار لينا سائل محتاج أى حاجة وفي ناس بتقولك ساعدني حتى بجنيه!
كلنا عارفين إن الجنيه اللي هنعطيه للسائل ده مش هيفرق ولا هيمَثِّل فرق لدَى معظمنا، لكن مع ذلك مش بنُعطي حتى الجنيه! 
وده علاقته إيه بصيام يوم الاثنين والخميس!!! 
يوم القيامة هتلاقي ناس سائلة برضو عمالة تلف عايزة حد يعطيها بس مش عُملة ولا مال لا دي عايزة أثمَن حاجة هتكون معاك هناك عايزة حسنة واحدة بس (مش حسنات خد بالك)
طيب بتلف على حسنة ليه ياترى؟تفتكر إيه في حد ممكن يعطي أو يفرط في حسنة من حسناته؟
حد من السلف الصالِح قال إن أهل المعروف في الدنيا هما أهل المعروف في الآخرة وإن اللي بيساعد في الدنيا هيساعد في الآخرةطيب ده أيه علاقته بموضوعنا احنا تُهنا!
نتخيل عند الميزان واحد واقف مرعوب يكون من أهل النار أو أهل الأعراف، عايز يدخل الجنة بأى طريقة مع كل سيئة تتحط طبيعي يظن إنه خلاص هيهلك
فيجي يوم صامه خالصََا لله صام يوم يرجو به رضا الله بس،ده مش عليه حسنة ولا اتنين ده ربنا سبحانه وتعالى قال إلا الصَّوم فإنَّه لي وأنا أجزي بِه
تخيَّل عطايا الكريم هتكون أد إيه !؟ ولا ربنا هيجازيك على اليوم ده ازاى؟
بعد جزاء ربنا اللي مالوش حدود ليك واللي هينجيك أصلاََ برحمة الله وفضله عليك، لو أنتَ من أهل المعروف في الدنيا كمان ممكن تلاقي نفسك بتُعطي حسنات لناس عشان ماتدخلش النار
كل ده بيوم واحد بس؟؟أنتَ مش متخيل يوم واحد صيام هينقلك ازاى وهيفرق معاك في آخرتك ازاى
طيب بالله عليك أيه اللي مانعك تصوم؟ إيه اللي مانعِك تصومي؟
استعينوا بالله وصوموا، يوم الصيام في الشتاء هدية واللي هيصومه هيكون فاز ورب الكعبة!
لعل اليوم ده نجاتك اوعى تعدي الشتاء كده من غير مكسب وفوز وغيرك عمال يزوِّد نفسه بالزاد الحقيقي (زاد الآخرة)ولازم ناخد بالنا إن شهر ديسمبر ويناير نهارهم قصير وليلهم طويل