وفي النهاية... طلع الباب مفتوح!!!
🤷🏻 مين اللي قال إن الباب اللي بينك وبين ربنا مقفول؟
🤔 أنت امتى طلبت من ربنا وربنا مدّكش، اكسر الحواجز الوهمية اللي بينك وبين ربنا، الأبواب مفتوحة قدامك أنت اللي عملت حواجز تخيلتها أو تصورتها...
⁉️ امتى أُغلق الباب حتى يفتح؟؟
⁉️ أنت ربنا نجدك وأغاثك كام مرة؟
⁉️ أنت ربنا استجاب لدعاءك كام مرة؟
🌨 ربنا بيدي ويستجيب لدعاء الطائع والعاصي دا ربنا استجاب لدعاء إبليس هوا فيه حد أسود من إبليس ؟؟
🚫 ربنا مالوش أوقات معينة تدعي له فيها، دا النبي صلى الله عليه وسلم كان بيدعي وهوا داخل بيته وهوا خارج من بيته، وهوا بياكل وهوا بيشرب، وهوا بيركب دابته، وهوا داخل الخلاء وهوا خارج من الخلاء...
🤲🏻 الدعاء هوا أكثر عبادة هتوصلك لأحلامك وهتغير كل تفاصيل حياتك
✊🏻 كلمة يارب المفروض تكون أكتر كلمة بتتقال في قاموس حياتك على قد ماهتقول كلمة يارب على قد حياتك ماهتتغير للأفضل
🌨 {وَقَالَ رَبُّكُمُ ادْعُونِي أَسْتَجِبْ لَكُمْ ۚ}
👈🏻 الآية دي ربنا بيكلم بيها الدنيا كلها المسلم والكافر، الطائع والعاصي، الذاكر والغافل، اللي قام الليل امبارح واللي مبيركعهاش، المؤمن والملحد، الحاكم والمحكوم، السليم والمريض....
🤲🏻 ارفع إيدك وادعي ربنا مفيش حواجز بينك وبينه
👌🏻ياعم خلي السكة اللي بينك وبين ربنا مفتوحة وربنا هيفتح عليك
🤲🏻 {إِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ}
✌️الآية دي مهمة أوي عشان حاجتين
1️⃣عشان أجيب دعوة الداعِ(أي حد رفع إيده يبقى داعِ)سواء طائع أو عاصي، هو خلقك عشان تقف على بابه ويفرحك
2️⃣ إن الآية دي جات بعد قول الله تعالي {شَهْرُ رَمَضَانَ} يعني ربنا قال دعوة الداع بعد رمضان يعني أكبر قضية في حياتنا قضية الدعاء المستجاب
🤚🏼 اوعي تعيش طول حياتك فاكر إن الباب مقفول وهو مفتوح مفيش أي مشكلة إنك تدخل وتعرف إن الباب مفتوح
🤲🏻 يارب اللهم استجب دعاءنا اللهم اهد قلوبنا اللهم ثبت ألسنتنا
تعليقات
إرسال تعليق